कोटक महिंद्रा बँकेने टाकले ‘हे’ महत्वपूर्ण पाऊल, गुंतवणूकदारांच्या आशांना मिळाले बळ

भारतात क्रिप्टोकरन्सी येणार की नाही याबाबत बऱ्याच चर्चा सध्या झडत आहे. संसदेत देखील हा मुद्दा गाजत आहे. दरम्यान यातच एक महत्वाची अपडेट समोर येत आहे. कोटक महिंद्रा बँकेने याबाबत नुकतीच एक घोषणा केली आहे.

यानुसार, कोटक महिंद्रा क्रिप्टोकरन्सी ट्रेडिंगसाठी दरवाजे उघडणारी भारतातील पहिली मोठी बँक बनली आहे. क्रिप्टोकरन्सीवर बंदी घालण्याचा सरकारचा इरादा नसल्याचे जाणवल्यनंतर सदर एक्सचेंजवर ट्रेड करणाऱ्यांसाठी प्लॅटफॉर्म म्हणून बँकेने WazirX एक्सचेंजमध्ये खाते उघडण्याचा निर्णय घेतला आहे.

डिजिटल ॲसेटवर पूर्णपणे बंदी येण्याच्या भीतीने बहुतांश प्रमुख बँकांनी काही महिन्यांपूर्वी पेमेंट करणे बंद केले होते. तसेच, रिझर्व्ह बँक ऑफ इंडिया (RBI) ने क्रिप्टोकरन्सद्वारे चालविल्या जाणाऱ्या सध्याच्या आर्थिक व्यवस्थेवर वारंवार चिंता व्यक्त केली होती.

कोटकने WazirX मध्ये खाते उघडले आहे आणि आवश्यक कागदपत्रे आणि चाचणी सुरू असल्याचे अहवालामध्ये म्हटले आहे. सदर गोष्टी पूर्ण झाल्यास WazirX मध्ये ट्रेड करणार्‍या गुंतवणूकदारांना बँक खात्याद्वारे पैसे भरण्यास आणि प्राप्त करण्यास अनुमती मिळेल.

देशातील क्रिप्टोकरन्सीचे भविष्य नियंत्रित करण्यासाठी सरकार कायद्याचा विचार करत असताना ही बातमी आली आहे. आठ महिन्यांसाठी, देशातील बहुतेक हाय-प्रोफाइल बँकांनी क्रिप्टोकरन्सी पेमेंट गोठवले होते.

एका अहवालानुसार भारतातील क्रिप्टोकरन्सीचे नियमन करण्याच्या प्रस्तावित कायद्यानुसार, क्रिप्टो फायनान्सवरील सरकारच्या नियमांचे उल्लंघन करणार्‍या लोक आणि संस्थांना 20 कोटी रुपयांपर्यंत दंड आणि 1.5 वर्षांच्या तुरुंगवासाची शिक्षा होईल.

एप्रिल 2018 मध्ये, RBI ने बँकांना क्रिप्टो व्यवहारांना समर्थन देण्यास मनाई केली होती. एका वर्षानंतर सर्वोच्च न्यायालयाने ही बंदी मागे घेतली. या वर्षी मे मध्ये, RBI ने सर्वोच्च न्यायालयाच्या निर्णयाचा हवाला दिला आणि बँकांना स्पष्ट केले की ते आता क्रिप्टोकरन्सी मार्केटमध्ये गुंतवणूक करु शकतात.